Vazir Toshkent viloyatida: ta'lim muassasalarining yangi o‘quv yiliga tayyorgarlik holati o‘rganilmoqda

 23-avgust kuni Maktabgacha va maktab ta'limi vaziri E'zoza Karimova Toshkent viloyatida bo‘lib, qator ta'lim muassasalari faoliyati bilan tanishdi.

 Dastlab vazir E’zoza Karimova Bekobod tuman hokimi Zaynilobiddin Nizomiddinov bilan uchrashib, tumanda ta’lim sifatini oshirish masalalari muhokama qilindi

Muloqotda “Bekobod tajribasi” asosida tumandagi barcha maktablarda yangi baholash tizimini joriy etish haqida so‘z yuritildi.

 Shuningdek, endilikda Nizomiy nomidagi O‘zbekiston milliy pedagogika universiteti va Chirchiq davlat pedagogika universiteti professor o‘qituvchilari tomonidan tuman maktablarida mahorat darslari tashkil etib boriladi.

 Shundan so'ng, vazir tumandagi 7-maktabda pedagoglar bilan uchrashib, o'quvchilar uchun yaratilgan sharoitlar hamda amalga oshirilayotgan loyihalarni ko'zdan kechirdi.

Mazkur maktabga “Vazir sovg‘asi” — kompyuter jamlanmalari ham sovg‘a qilindi.

 Shuningdek, vazir E’zoza Karimova 32-maktabdagi qurilish jarayonlarini jadallashtirish hamda jihozlash ishlari to‘g‘risida mas’ullarga topshiriq berdi.

Vazir shu kuni Bekobodning olis, tog’oldi hududida joylashgan, yangi qurilayotgan 34-DMTTning qurilish ishlari bilan tanishdi.

 Mas’ullar bilan uchrashuvda vazir Bekobodda DXSH asosida barpo etilayotgan nodavlat ta’lim klasteri tashkil etish loyihasi haqida so‘z yuritib, ushbu klaster maqsad va vazifalari muhokama qilindi.

Piskent tumanidagi 12-sonli maktab va Bo’ka tumanidagi 5-maktablarda ham yangi o’quv yiliga tayyorgarlik jarayonlari ko’zdan kechirdi.

Shuningdek, ta’lim muassasalaridagi pedagoglar bilan uchrashib, ularning fikr-mulohazalariga quloq tutdi.

 Muloqot davomida ustozlarning kasbiy mahoratlarini oshirish, ularni ijtimoiy qo‘llab-quvvatlash va yangi baholash tizimiga o’tish kabi mavzularda so‘z bordi.

 Vazir shuningdek, yangi o‘quv yiliga tayyorlik jarayonlari yuzasidan o‘z tavsiyalari bilan bo‘lishdi va mas’ullarga tegishli topshiriqlar berildi.